Unnskuld, Sør-Korea

Vorspiel utan fest. Etter ei fabelaktig nuddelsuppe, sovna eg då Sør-Korea spelte 1-1 mot Russland. Fråveret fyller meg med skuldkjensle. Kven er eg til å vurdere gårsdagens kamp som mindre tiltalande og underhaldande enn tradisjonelle a4-oppgjer som Italia-England og Spania-Nederland? Fotballhipsteren inni meg grin.

Dak-kalguksu

La meg starte frå byrjinga: Sjølv om søvnen hindra meg i å heie fram dei elleve kvitkledde som sprang ut på Arena Pantanals ved midnatt, var det ingenting å seie på den kulinariske oppladinga. Pieter Jan hadde sett seg lei på føregåande dagars fettfest, og var klar for eit noko sunnare alternativ: Dak-kalguksu, som på norsk kan kan karakteriserast som nuddelsuppe med kylling. For Bergens største suppe-entusiast var dette eit naturleg val, og underteikna var heller ikkje vond å be.

Suppe:

1-1,5 kilo kyllingfilét

Vatn, 5 dl

2 squash

2 løk

20 (!!) fedd med kvitlauk

1 bunt vårlauk

Fiskesaus, 3 ss

Sesamolje, 2 ss

Salt, 3 ts      

Pepper, mykje

Nudler:

Mjøl, 4 koppar

Potetmjøl, 1 kopp

Salt, 2ts

Olivenolje, 2 ts

Vatn, 2-3 dl

Slik gjekk det til: Først fylte me opp ei relativt stor gryte med kaldt vatn til kyllingfiletane, lauken og kvitlauken. Kvitlauksfedda var heile, og løken hadde me kutta i berre fire delar. Desse blei likevel fjerna seinare, skulle med andre ord kun gje smak. Dette koka me opp, og lot småkoke i cirka ein time. Fiskesaus, litt sesamolje og ein mengd med pepper blei tilsatt etterkvart.

Eirik knar "nuddeldeig" som om han aldri har gjort anna

Deretter gjekk me i gong med nuddeldeigen. Oppskriftsmessig (og som eg lærte på Fløgstad skule i 1997), blanda me alt det tørre før me tilsatte olja og vatnet. Deigen knadde me til den var fast og tørr, før den blei lagt i ein plastikkpose og kasta i kjøleskåpet. Denne prosedyren gjentok me firegonger, med ca eit kvarters mellomrom.

맛있는

“Inga Dak-kalguksu utan zucchini”, som dei antakeleg seier i Korea. Squashen og vårløken finhakka me; førstnemnde i lange strimlar, sistnemnde i ringar. Dette blanda me så inn med eit par klyper salt. 

Kyllingen var god og mør etter halvannan times koking saman med resten av krafta, og no gjenstod berre sjarmøretappen. Som sagt tok me ut alt frå kyllingkrafta, men det var berre kvitløken og kyllingen me tok vare på. kyllingen kunne ein no lett rive i strimlar, og kvitlauken blei most i lag med litt salt, pepper, soyasaus, og vatn. deretter var det berre å blande kyllingen og marinaden sammen. 

Tilbake til nudlane: Etter rundt ein time, tok me deigen ut av kjøleskapet, og kjevla til den var ca to mm tjukk. Ved hjelp av pizzahjulet skjærte me så tynne og lange strimlar. Desse vart så helt i den kokande krafta i tre omgangar — i fem, seks minutter. På dette tidspunktet lukta leiligheta vår meir eksotisk enn naboen i første etasje (Allehjørnet thaimat), og resten av følget sat seg til bords. 

Hannah vikarierer som nuddelstativ

Yong, Yong, Jeong, Young, Young, Yong, Young, Yueng og Young.

Kva så med kampen? Sett bort frå fire gule kort, tre mål og ein Akinfeev-tabbe tatt ut frå læreboka til ein viss blunkande telemarking, hadde kamprapportane elles lite å melde om. Men sjølv om Sør-Korea som fotballnasjon framleis har betringspotensiale, er det mangfoldige grunnar (i alle fall fem) til at dette mytiske landet fortjener betre enn ein søvande liksom-supportar som meg. Eg nemner i fleng: 

• Det finst neppe ein dommar i verden som ikkje blir svett av å halde orden på denne lagoppstillinga: Ryong, Yong, Jeong-Ho, Young-Gwon, Suk-Young, Chung-Yong, Kook-Young, Ja-Cheol, Sung-Yueng, Heung-Min, Chu-Young. Blir du spurt om din favorittspelar frå Sør-Korea, gå for Young. Idiotsikkert.

•  Big in Korea: Er det noko koreanerar kan, er det å hylle sine heltar. Hugsar du Uniteds duracellkanin Ji-Sung Park? Midtbanespelaren er så svær i heimlandet at han mottok meir fanpost enn nokon annan spelar i Premier League. Han har til og med eit eget museum i heimbyen! 

• Likar du usexy og ujålete fotball, og føler Serie B og Zweite Bundesliga blir for mainstream, er Sør-Koreas eigen K-League kanskje ligaen for deg. Blant dei einaste utanlandsproffane med erfaring frå både K-Leauge og Champions League, finn me ingen ringare enn Jon Olav Hjelde. Kanskje er museet under planlegging?

• I 1983 blei Hallelujah FC sør-koreanske seriemeisterar.

• Sør-Korea har verdas einaste fornøyelsespark med toalett-tema.

Igor Akinfeev lukter på hanskene sine som var smurt inn med såpe for anledningen

 

For å bidra til ytterlegare forsoning mellom meg og republikken Korea, ba eg også mine gode vener om å dele sine djupaste tankar om halvøya i Aust. Spørsmålet var enkelt: Kva er det beste med Sør-Korea? 

“Gode naboar!” (Sondre, 25 år)

“Hentaipornoen! Men vent, er ikkje det Japan?” (Jon Marius, 25 år)

“Billig teknologi. Sør-Korea har fulgt meg gjennom livet som trufast ven på data- og mobilfronten. For dette skal eg alltid vere dei evig takksame.” (Pieter Jan, 25 år)

Takk og unnskuld, Sør-Korea. Sjølv om eg ikkje var på festen, var i alle fall vorspielet upåklageleg.

 

 /Eirik