Belgia og blåskjell

Etter Belgias verste notering på FIFA-rankingen gjennom tidene (74. plass i 2009), har dei for alvor tredd ut av landslagsfotballens skuggedal. I forkant av meisterskapet var Belgia blant dei mest framsnakka blant ekspertane. Men kunne dei takle det aukande presset mot amerikanske duracellkaniner? Under åttedelsfinalen var det på tide å gi litt ekstra merksemd til fotballverdas nye kjeledegge. Det var duka for sjølvplukka blåskjell og heimelaga pommes frites!

I størstedelen av våre drygt tjue år som supporterar har Belgia vore ein svart flekk på våre mentale fotballkart. Belgiarane har liksom alltid vore dei stusselege og keisame litlebrødrene til dei tekniske nederlendarane og stilege franskmennenne. Med legendariske barne- og ungdomsheltar som van der Sar, Thuram, van Persie og Henry på toppen av høvesvis adelslista og toppscorarlista, er det trist å lese om Belgias største legendar. Kven, utanom Arne Scheie, har inngåande kjennskap til Jan Ceulemans (96 kampar), Bernard Voorhof og Paul Van Himst (30 mål)?

Om du spør oss om å nemne alt me forbinder med Belgia, vil  pommes frites sannsynlegvis bli nemnd ein stad mellom Eden Hazard og pedofili-skandalar. Pommes frites er opphavleg ein belgisk rett, trass i den svært så misvisande engelske oversettinga. Myten vil visst ha det til at namnet oppsto under den første verdskrigen, då amerikanske soldatar observerte sine fransktalande (men langt i frå franske) kolleger fritere små potetstavar. Og som me veit: Dersom amerikanarane bestem seg for noko, blir det gjerne verande slik, sjølv om belgiarane har knaska pommes frites sidan 1600-talet.

Den mest kjende pommes frites-baserte retten er Moules frites. Retten består av blåskjell og pommes frites og kan tilrettast på mange måtar, til dømes i kombinasjon med kvitvin eller rømme. Me tykte derimot det var på sin plass å gå for varianten Moules à la bière – øldampa blåskjell. Rett nok er det vanlegast å dampe blåskjell i witbier, men me juksa og gjekk for pale ale. Det betyr på ingen måte at me neglisjerte den belgiske øltradisjonen. Måltidet blei nemleg komsumert i lag med trappist og sour ale.

Korleis fekk me tak i blåskjella, spør du? Sondre, som ein gong hadde lest at blåskjella trivst i sterk straum, kunne stolt fortelje om ein potensielt god blåskjell-stad. Me traff blink, og femten minutt og tre fulle plastposar seinare kunne me starte blåskjell-reingjeringa.

Forslag til posering under blåskjellrensing

Moules à la bière med pommes frites og majones. Ingrediensar (ca 6 personar):

Ca 6-7 kilo blåskjell

5 sjalottlauk

½ liter pale ale

1 chili

3 kvitlauksfedd

Spansk peppar

Salt

12 poteter

Ca 5 dl nøytral olje, t.d. solsikkeolje

2 spiseskeier dijonsennep

1 sitron

(2 dl fløte, om du vil lage saus på den gjenverande krafta)

Framgangsmåte:

1) Når blåskjella er reine og fine, kutt opp grønnsakene. Potetstavane skal vere på storleik med ein peikefinger, og sjalottlauken, kvitlauken og chilien skal vere finhakka.

2) Legg potetstavane i kaldt vatn i minst 15 minutt. Slik får du skylt vekk stivelsen. La dei så tørke på eit kjøkkenhåndkle

3) Kok potetstavane til dei er så smuldrete at dei nestan løsnar. Kjøl dei ned etterpå.

4) Lag majonesen. Me juksa litt, og henga oss fullstendig til Meny si fantastiske oppskrift. Google it.

5) Hell rundt 4-5 dl olje i ei gryte, slik at det er høgt nok til at det er rikeleg med væske til at ein enkelt kan vende på potetstavane undervegs. Når olja er 13-150 grader, eller varm nok til at olja bobler rundt tresleiva, er du klar til å legge potetene forsiktig oppi. La dei fritere til dei blir lysebrune på kantane. Hos oss tok det 15-16 minuttar, med litt over middels styrke på plata. Med 12 nokså store poteter, måtte me gjenta heile denne rutina to gonger.

6) Hald potetene varme i steikeomnen, ca 60 grader. Hell litt olje i gryta, og surr sjarlottlauk, kvitlauk og chili på middels varme. Tilset peppar timian og eventuelt andre urter.

7) Tilsett så skjella, legg på lokket og la dei dampe i 1-2 minutt. Hell så oppi ein halv boks øl, og la det stå i ytterlegare 3-4 minutt. Dei skjella som ikkje har opna seg, må du kaste.

8) Dersom du vil slå ekstra på stortromma, kan du lage saus av krafta. Då må du ta alle blåskjella ut av gryta, og tilsetje eit par desiliter med fløte. La det koke til det blir litt tjukkare. Kan anbefalast!

9) Dersom du ikkje er heilt nøgd med sprøheita på potetene – fritèr dei ein siste gong i tre-fire minuttar, men denne gongen med sterkare varme. Dette steget kan også sløyfast, men jo lengre tid det har gått sidan friteringa, jo mindre sprøe blir dei.